रैनादेवी छहरा गाउँपालिकाको गाउँसभा अधिवेशन सुरु, नीति तथा कार्यक्रम सर्वसम्मत पारित

छहरा, असार ८ — रैनादेवी छहरा गाउँपालिकाको गाउँसभाको १८औँ अधिवेशन आज गाउँपालिकाको बैठक हलमा सुरु भएको छ। अधिवेशनको पहिलो बैठक गाउँसभा अध्यक्ष श्री रुक्माङ्गत भट्टराईको अध्यक्षतामा सम्पन्न भएको हो।
बैठकको सुरुवातमा उपाध्यक्ष श्री युवराज थापाले शुभकामना मन्तव्य व्यक्त गर्नुभएको थियो। शून्य समयमा सभा सदस्यहरू दान बहादुर थामी, धन बहादुर रायमाझी, अर्जुन प्रसाद ज्ञवाली र रविलाल पोखरेलले समसामयिक विषयहरूमा आफ्ना विचार राख्नुभएको थियो।
रैनादेवी छहरा गाउँपालिकाको गाउँसभाको १८औँ अधिवेशनमा सभाका अध्यक्ष रुक्माङ्गत भट्टराईद्वारा आर्थिक वर्ष २०८२/८३ का लागि प्रस्तुत नीति तथा कार्यक्रम “आर्थिक, सामाजिक, पर्यटन र पूर्वाधारः समृद्ध रैनादेवी छहराको मूल आधार” भन्ने नारामा आधारित रहेको छ। कार्यक्रमले कृषि, रोजगारी, शिक्षा, स्वास्थ्य, पूर्वाधार, वातावरण संरक्षणलगायत पाँच प्रमुख प्राथमिकतालाई केन्द्रमा राखेको छ। दिगो विकास, सुशासन, पारदर्शिता र जनउत्तरदायी सेवा प्रवाहका साथ आत्मनिर्भर, समुन्नत र सुखी गाउँपालिका निर्माण गर्ने लक्ष्य लिएको यस नीतिमा समावेशी विकास, नवप्रवर्तन, प्राकृतिक स्रोतको सदुपयोग र स्थानीय उत्पादनमा आधारित उद्यमशीलताको प्रवर्द्धनलाई जोड दिइएको छ। नीति तथा कार्यक्रममाथि भएको छलफलमा सभा सदस्यहरू दान बहादुर थामी, रविलाल पोखरेल, धन बहादुर रायमाझी, अर्जुन प्रसाद ज्ञवाली र सूर्य बहादुर कार्कीले विभिन्न सुझावहरू दिनुभएको थियो। ती सुझावहरू समेट्दै नीति तथा कार्यक्रमलाई गाउँसभा बैठकले सर्वसम्मत पारित गरेको छ।
सभाध्यक्षले गाउँसभाको १८औँ अधिवेशन अन्तर्गत दोस्रो बैठक असार ९ गते दिउँसो १:०० बजे बस्ने जानकारी गराउँदै आजको बैठक समापन गर्नुभएको थियो।