गाउँसभाको १८औँ अधिवेशन सम्पन्न
===========================================
गाउँसभाको १८औँ अधिवेशनको तेस्रो बैठक मिति २०८२ असार २७ गते गाउँपालिकाका अध्यक्ष रुक्माङ्गत भट्टराईको अध्यक्षतामा सम्पन्न भएको छ । शुक्रबार सम्पन्न तेस्रो बैठकले उपाध्यक्ष श्री युवराज थापाले पेश गर्नुभएको आर्थिक वर्ष २०८२/८३ का लागि कुल रु. ८० करोड ४६ लाख १२ हजार ८२५ बराबरको बजेट पारित गरेको छ ।
गाउँपालिकाले "आर्थिक, सामाजिक र पूर्वाधार : समृद्ध रैनादेवी छहराको मूल आधार" भन्ने नारासहित बजेट तर्जुमा गरेको छ। प्रस्तुत बजेटले स्थानीय पूर्वाधार विकास, कृषि उत्पादन, शिक्षा, स्वास्थ्य, रोजगारी, सूचना प्रवाह, पयर्टन र सामाजिक समावेशीतालाई प्राथमिकता दिएको छ। रु. ८० करोड ४६ लाख १२ हजार कुल बजेट मध्ये चालू तर्फ रु. ४९ करोड ७८ लाख ५७ हजार र पुँजीगत तर्फ रु. ३० करोड ६७ लाख ५५ हजार बजेट विनियोजन गरिएको छ ।
उपाध्यक्ष थापाले बजेट प्रस्तुत गर्दै पालिकाले संविधान, नीति दस्तावेज, संघ–प्रदेशका कार्यक्रम, स्थानीय सुझाव र दीगो विकासका लक्ष्यहरूलाई मध्यनजर गर्दै बजेट तर्जुमा गरिएको जानकारी दिनुभयो। स्थानीय स्रोतसाधनको अधिकतम प्रयोग, जनउत्तरदायित्व, पारदर्शिता र समन्वयमा आधारित योजनाको प्रभावकारी कार्यान्वयनमा गाउँपालिका प्रतिबद्ध रहेको छ।