रैनादेवी छहरा गाउँपालिकाले नागरिकहरूलाई सहज रूपमा वडा स्तरबाटै सेवा प्रवाह गर्न सम्पूर्ण वडा कार्यालयहरूमै पुगेर एकीकृत घुम्ति शिविर सञ्चालन गरेको छ। शिविर साउन १८ गते ८ नं वडा कार्यालयमा सुरु भई साउन २६ गते ४ नं वडा कार्यालयमा समापन भएको थियो।
गाउँ कार्यपालिकाको कार्यालयबाट प्रमुख प्रशासकीय अधिकृत कृष्ण प्रसाद ज्ञवाली, स्वास्थ्य शाखा प्रमुख जनस्वास्थ्य अधिकृत जीवन राना, मेडिकल अधिकृत डा. शिशिर कुमार पटेल, प्रशासन शाखा प्रमुख सहायक प्रशासकीय अधिकृत प्रकाश के.सी., कृषि शाखा प्रमुख सिर्जना थापा, पशु विकास शाखा प्रमुख धिरोज मगर, सहायक महिला विकास निरीक्षक छबिता देवकोटा लगायत कर्मचारिहरू वडास्तरमै पुगेर सेवा प्रदान गर्नुभएको थियो ।
शिविरमा अपाङ्गता परिचयपत्र नवीकरण तथा वितरण, ज्येष्ठ नागरिक परिचयपत्र वितरण, व्यवसाय दर्ता तथा नवीकरण, दीर्घ रोगी तथ्याङ्क अभिलेखीकरण, कृषक समूह दर्ता तथा नवीकरण र कृषि तथा पशुपन्छी फर्म दर्ता तथा नवीकरण सहित विभिन्न ६ प्रकारका सेवाहरू प्रदान गरिएको थियो ।
शिविर अवधिभर २०१ जनाको अपाङ्गता परिचयपत्र नवीकरण, ४६ वटा ज्येष्ठ नागरिक परिचयपत्र वितरण, १८ वटा कृषि तथा पशुपन्छी फर्म नवीकरण, २५ जना दीर्घ रोगीहरूको विवरण दर्ता, ३ वटा नयाँ व्यवसाय दर्ता तथा ३५ वटा व्यवसाय नवीकरण गरिएको छ ।